A UNED ofrece un curso de xeopolítica das Primaveras Árabes norteafricanas

9 de abril de 2025

Será do 22 de abril ao 13 de maio, cun total de 20 horas lectivas e un crédito ECTS, e poderá seguirse en modalidade presencial desde o noso salón de actos ou en liña.

OURENSE, 9 de abril de 2025. Este curso de extensión en UNED Ourense analiza as transformacións máis relevantes rexistradas no Norte de África desde a denominada Primavera Árabe ata os nosos días, prestando especial atención tanto á súa dimensión internacional, especialmente na súa relación con Europa, como ás dinámicas locais. A partir de 2011 tiveron lugar unha serie de mobilizacións populares de carácter antiautoritario que abrangueron parte do denominado mundo árabe. Desa onda de contestación emerxeron actores que tentaron cuestionar dinámicas políticas vixentes desde a consecución das independencias nacionais, caracterizadas pola coerción política. Máis dunha década, transcorreu, suficiente tempo para analizar con perspectiva histórica os cambios de orde política, social e económico que xeraron, e para abordar ata que punto ditas mobilizacións tiveron éxito ou, pola contra, fracasaron, así como das implicacións que estas tiveron para o Magreb e os seus veciños europeos.

Os alumnos lograrán unha visión integral das primaveras árabes no Magreb, comprendendo a súa relevancia histórica e os seus impactos no particular contexto político, social e económico da rexión; ademáis de establecer conexións con outras dinámicas globais e presentar análises críticas dos retos actuais no Norte de África.

As datas de celebración serán do 22 de abril ao 13 de maio, en horario de 17:00 a 20:00 horas, desde o salón de actos de UNED Ourense. Poderase asistir presencialmente e en liña. Dispón de 20 horas lectivas (15 de docencia e 5 de traballo final). Permite obter 1 crédito ECTS. As sesións serán impartidas por David Manuel Alvarado Roales, doutor en Ciencias Políticas pola USC, profesor Asociado na Uvigo e docente en UNED Senior Ourense.

O programa do curso é o seguinte:

Martes, 22 de abril:

Contexto xeral: causas e impacto das primaveras árabes.
Continuidade e cambio nos réximes políticos do Norte de África e Oriente Medio.

Martes, 29 de abril:

Tunes: encrucillada democrática.

Martes, 6 de maio:

Marrocos: espellismo transicional.

Venres, 9 de maio:

Alxeria: o Hirak contra os xenerais.
Libia: entre autoritarismo e un Estado errado.

Martes, 13 de maio:

Que queda das primaveras árabes? Balance, perspectivas e retos de seguridade.
UE-Magreb, veciños afastados.

Matrícula

Matrícula Ordinaria: 30 euros
Alumnos UNED: 20 euros
Estudantes alleos á UNED (outras universidades, ciclos FP, escola oficial de idiomas, conservatorio de música) : 20 euros

Matrícula en liña

Este curso vai dirixido a estudantes universitarios do ámbito das ciencias políticas, historia, xornalismo, relacións internacionais e interesados en xeral na materia. Os obxectivos son os seguintes:

Analizar os factores históricos, políticos, sociais e económicos que antecederon ás primaveras árabes no Magreb.
Contextualizar os movementos de protesta dentro do marco histórico xeneral, destacando as interconexións entre globalización, tensións económicas e avances tecnolóxicos.
Identificar a detonantes clave das primaveras árabes no Magreb, como o desemprego xuvenil, a corrupción, a falta de liberdades políticas e a desigualdade social.
Explorar o papel dos factores económicos (como a inflación ou a pobreza) e culturais (desexo de maior democratización e dereitos humanos).
Comparar as traxectorias das primaveras árabes nos diferentes países do Magreb e as súas características específicas.
Analizar as estratexias gobernamentais e sociais para enfrontar e canalizar as protestas e o descontento das poboacións.
Avaliar os resultados a nivel político, social e económico, como os avances en democracia, dereitos humanos e reformas estruturais nalgúns países e os retrocesos noutros.
Examinar os desafíos pendentes: estabilidade política, desenvolvemento económico e fortalecemento das institucións.
Explorar a influencia de actores internacionais, sobre todo a Unión Europea, Turquía, no desenvolvemento dos movementos de contestación.
Analizar o papel das redes sociais e os medios de comunicación na difusión dos ideais e a organización das protestas.
Avaliar as leccións que as primaveras árabes poden ofrecer para outros movementos sociais a nivel global.

O sistema de avaliación consistirá na elaboración dun traballo práctico que persegue a aplicación do groso de contidos aprendidos na aula, computable con 5 horas. Este curso conta coa dirección de Julio Prada Rodríguez, Catedrático de Historia Contemporánea e profesor titor de UNED Ourense, así como coa colaboración da Universidade Mohamed V de Rabat.

Obxectivos de Desenvolvemento Sostible

Esta actividade impacta no ODS 16.