Mapa web
Youtube
Campus UNED

Hoxe ábrese o prazo de matrícula das xornadas da UNED para revisar o legado arquitectónico e urbanístico de Antonio Palacios

1 de septiembre de 2021

Durante a primeira semana de outubro seis poñentes analizarán desde Ourense os traballos do xenial arquitecto en Madrid e en Galicia así como os seus debuxos. As sesións serán públicas no Centro Cultural Marcos Valcárcel e para obtener 0,5 créditos ECTS e diploma da UNED será preciso matricularse a partir do 1 de setembro

OURENSE, 1 de setembro de 2021.- UNED Ourense organiza e celebrará unhas xornadas sobre o legado do arquitecto Antonio Palacios Ramilo (O Porriño, 1974-Madrid, 1945), cuxo prazo de matrícula ábrese hoxe, 1 de setembro. Terán lugar do 4 ao 8 de outubro no salón de actos do Centro Cultural Marcos Valcárcel da Deputación de Ourense. Antonio Palacios pasou á historia polas súas obras de arquitectura, como o Palacio de Comunicacións de Madrid, o Círculo de Belas Artes da capital española; estacións e logotipo da primeira liña de Metro, o Concello do Porriño, o templo votivo do Mar de Panxón e, entre outras moitas, o fornelo da Rede de San Luís. Tamén hai outro Antonio Palacios máis descoñecido como o debuxante e pintor, autor de numerosas acuarelas, cadros e bosquexos. Na provincia de Ourense deixou preparados os proxectos para o novo santuario da Encarnación en Celanova, para a praza de San Martín fronte á catedral, trazas ambas que non se traduciron en construcións, quedando sobre o papel. A única que se converteu en edificio é a da igrexa da Veracruz no Carballiño. Tamén aconsellou ao entón párroco de Seixalbo nos anos 30 do século XX, para non vender unha imaxe medieval da Virxe.

Estas xornadas supoñen 10 horas lectivas e permiten obter 0,5 créditos ECTS que concede a Facultade de Historia da UNED. As sesións serán presenciais e en liña.

Programa

O luns, 4 de outubro, ás 19.00 horas, intervirá José Luís Varela Alén, arquitecto pola Escola Técnica Superior de Arquitectura da Coruña da UDC (1994). Doutor en Arquitectura pola UDC, membro do grupo de investigación da UDC, Paisaxe, arquitectura e cidade (pARQc). A súa conferencia titúlase: A perpetua trasfega palaciana: O Porriño, Vigo e contorna

O martes, 5 de outubro, á mesma hora, intervirá Antonio Perla de las Parras, profesor contratado doutor da UNED, en Historia da arte (Técnicas e Medios Artísticos e Historia da arte da Baixa Idade Media). O seu tema será: Desde Madrid, a obra de Antonio Palacios

O mércores, 6 de outubro, intenvendrá Jesús Manuel García Díaz, doutor en Historia pola Uvigo, licenciado en CC. da Información pola Universidade Complutense de Madrid e director de UNED Ourense. O seu tema para tratar é: Antonio Palacios, de Celanova á Catedral de Ourense.

O xoves, 7 de outubro, as xornadas terán carácter novamente ourensán coa participación de Felipe Senén López Gómez, licenciado en Historia da Arte pola Universidade de Santiago. Arqueólogo museólogo, xubilado da Deputación da Coruña (1997-2014) e anteriormente no Museo Arqueolóxico da Coruña (1974-1997). Disertará sobre A Veracruz do Carballiño na arquitectura de Antonio Palacios: Historia, teoría e simbolismo.

A xornada do venres, 8 de outubro, incluirá dous relatorios. O primeiro comezará ás 17.30, coa intervención de Jesús Ángel Sánchez García, catedrático de Historia da arte na Universidade de Santiago de Compostela e comisario da exposición Antonio Palacios: Soños de modernidade. Compromiso con Galicia, que se celebrará en setembro no Museo do Mar en Vigo. O seu relatorio para as xornadas de UNED Ourense titúlase: Antonio Palacios e os proxectos de reformas urbanas: do plan de Vigo á Rúa Galicia de Santiago de Compostela. Tras esta primeira intervención, ás 19.00 horas haberá unha segunda, a cargo de Álvaro Bonet López, arquitecto e vicepresidente da asociación Madrid Ciudadanía y Patrimonio. Bonet está a realizar a súa tese de doutoramento centrada na obra de Palacios, especialmente os seus proxectos industriais. Tamén estudou os debuxos do arquitecto homenaxeado de modo que en Ourense falará sobre Antonio Palacios debuxante.

Estas xornadas están dirixidas polo doutor Antonio Perla de las Parras e coordinadas polo director do Centro Asociado á UNED en Ourense, doutor Jesús Manuel García Díaz. Precisamente débense a García Díaz, que as promoveu desde Ourense para complementar dalgunha maneira a exposición que a Xunta promove en Vigo. E contan cun selecto grupo de expertos na obra palaciana. Van dirixidas a estudantes de grao e posgrao, arquitectos, deseñadores industriais, historiadores, enxeñeiros, titulados en turismo, sociólogos e especialistas doutras disciplinas pertinentes ou relativos ás temáticas das xornadas e interesados en xeral en coñecer a obra de Antonio Palacios.

As persoas que queiran seguir as xornadas en liña, obter o crédito ECTS e o diploma da UNED, deberán matricularse a partir de hoxe, 1 de setembro, na seguinte ligazón.

UNED Ourense

Comunicación

Carretera de Vigo Torres do Pino  s/n Baixo 32001 Ourense - . Tel. 988371444 info@ourense.uned.es