O director da S.A. Xacobeo falará en Xinzo do desenvolvemento da Vía da Prata

31 de marzo de 2025

Ildefonso de la Campa participará o mércores, 2 de abril, desde a Casa da Cultura de Xinzo de Limia, na quinta conferencia do ciclo organizado por UNED Zamora e UNED Ourense.

OURENSE, 31 de marzo de 2025. O director da Sociedade Anónima de Xestión do Plan Xacobeo de Galicia, Ildefonso de la Campa Montenegro, será o protagonista da quinta conferencia do ciclo Os camiños de Santiago: o Camiño Portugués da Vía da Prata por Zamora, Tras-Os Montes e Ourense, que organizan UNED Zamora e UNED Ourense por segundo ano consecutivo. A súa intervención terá lugar o mércores, 2 de abril, ás 19:00 horas, no salón de actos da Casa da Cultura de Xinzo de Limia. A entrada será libre ata completar aforo. De la Campa Montenegro disertará sobre Realidades e perspectiva de desenvolvemento da Vía da Prata. Esta conferencia é posible grazas á colaboración de Turismo de Galicia con este proxecto da UNED.

O roteiro de conferencias da UNED comezaba o pasado 6 de marzo na vila zamorana de Alcañices, seguindo en Bragança o 14 de marzo; en Vinhais o día 20 e en Monterrei, o pasado día 26. Agora tócalle a quenda á capital limiana.

Ildefonso de la Campa (1967) é licenciado en Xeografía e Historia pola Universidade de Santiago. Ocupou diversos postos na administración da Xunta de Galicia. Desde outubro de 2020 é director de Administración e Relacións coas Asociacións do Camiño de Santiago S. a. de Xestión do Plan Xacobeo. Desde o 1 de xaneiro de 2023 preside a Federación Europea do Camiño de Santiago. Previamente fora director xeral de Maiores e Persoas con Discapacidade (2018-2020).

Foi igualmente asesor do Presidente da Xunta de Galicia entre xullo e outubro de 2018. Desempeñou o cargo de director xeral de Migracións, do Ministerio de Emprego e Seguridade Social entre os anos 2017 e 2018. De la Campa foi Xefe de Gabinete da Secretaría Xeral de Emigración da Xunta, desde o ano 2009 ata 2016. Entre os anos 2006 e 2009 exerceu como Director Xerente da empresa Alcance, Consultoría Galega de Proxectos e previamente, desde 2004 a 2005 foi Director Xerente da Fundación Pública da Xunta de Galicia Axencia Humanitaria de Galicia.

Tamén prestou servizo como Xefe de Gabinete da Consellería de Emigración e Cooperación Exterior da Xunta de Galicia (2002-2004) e exerceu como asesor de protocolo do presidente Manuel Fraga Iribarne, ademais de ser responsable de loxística e seguridade do grupo executivo de ACNUR en Herzegovina Leste, prestando atención á poboación en situación de desprazados de guerra no conflito Bosnia-Herzegovina (1993-1994). Un ano antes fora asesor do Secretario Xeral para as Relacións coas Counidades Galegas.