"Buscade o Coñecemento, o pensamento crítico e o debate de ideas, que se opoñen á ramplonería, á falsedade, á arrogancia"

19 de mayo de 2025

O director de UNED Ourense dirixiuse aos estudantes dos institutos de Allariz e ó Lagoa de Antela, en Xinzo, para falarlles da UNED e dos retos de ser universitarios.

OURENSE, 19 de maio de 2025. O IES Lagoa de Antela, en Xinzo de Limia, e o IES de Allariz recibiron a visita do director de UNED Ourense, Jesús Manuel García Díaz, que se dirixiu aos estudantes de segundo curso de Bacharelato. No seu roda con estes mozos, que leva a cabo todos os anos, o director do centro universitario, explicoulles como se estuda na UNED e, por tanto, que é o que se van a atopar o curso que vén cando deixen a secundaria. Díxolles que na UNED non hai numerus clausus, "por iso a admisión a calquera dos nosos graos non está suxeita a nota de corte algunha, xa que o número de prazas non está limitado". Contoulles cales son as normas de admisión nesta universidade, do mesmo xeito que lles mencionou as titulacións que conceden acceso aos graos.

García Díaz explícalles igualmente cal é a estrutura desta universidade, a pública máis grande de España. "A UNED, en consonancia coa esencia do Espazo Europeo de Educación Superior, sitúa ao estudante no centro do seu propio proceso de aprendizaxe, favorecendo a formación de profesionais capaces de facer fronte aos retos da Sociedade do Coñecemento. Para iso, pon ao dispor dos seus alumnos unha metodoloxía en liña e semipresencial líder no seu sector que lle permite adaptarse a cada unha das súas situacións persoais, laborais, facendo posible así un dos seus obxectivos fundacionais: a universalización dunha Educación Superior de calidade sen límites xeográficos nin barreiras individuais", díxolles.

Hoxe son 30 os graos que se poden estudar na UNED, e todos os estudantes coñeceron cales son porque repásanos todos en cada sesión.

A flexibilidade da metodoloxía da UNED susténtase na maior infraestrutura tecnolóxica universitaria de España e unha rede de sedes nacionais e internacionais que fai posible a formación e a realización dos exames en calquera lugar do mundo. Xunto ás facultades e escolas superiores da UNED, esta universidade dispón dunha importante rede de Centros Asociados, que son as unidades territoriais que a UNED ten distribuídas por todo o territorio nacional e que desenvolven, baixo a Dirección, e en colaboración e coordinación coas Facultades, Escolas e Departamentos, a actividade docente, investigadora e titorial encomendada nos seus estatutos.

Nos Centros Asociados impártense de forma presencial e telemática as titorías, oriéntase e asiste aos estudantes, ofrécese o servizo de biblioteca, desenvólvense actividades de Extensión Universitaria e desenvolvemento cultural, organízanse e levan a cabo as probas presenciais e realízanse as prácticas de laboratorio das materias de 1.º e 2.º curso dos Graos. Os Centros Asociados teñen, ademais, Aulas Universitarias naquelas localidades da súa provincia que consideren conveniente e en colaboración coas institucións locais, levando desta maneira o ensino universitario a lugares máis afastados do propio Centro Asociado. No caso de Ourense existe a aula de Valdeorras, situada na Rúa.

Nas Aulas Universitarias impártense presencial ou de maneira telemática as titorías, pero non necesariamente todas as titulacións ofertadas polo seu Centro Asociado de referencia. Así mesmo, poden desenvolver actividades de Extensión Universitaria e cultural e orientar e facilitar as tarefas administrativas do estudante. Dispón, ademais, de 24 centros e aulas en Europa, África e América.

Os mozos de ambos os institutos seguiron con atención as palabras do director de UNED Ourense, que lles fala da vida de universitarios, de que teñen que poñer todo o esforzo en ler moito e ben, e escribir perfectamente sen faltas. Advertiulles que a UNED ten un elevado nivel de esixencia que repercute no alumno proporcionándolle unha boa formación.

García Díaz díxolles que se esforcen, que se formen, que busquen a verdade. "Como escribiu Julian Baggini, nesta sociedade nosa da posverdade, sociedade líquida, os nosos problemas proceden de que a autoridade dos expertos está zurrada, descartada, pasando a ocupar o seu lugar a autoridade das nosas tripas, das nosas emocións, da intuición... Esta sociedade non dá importancia aos verdadeiros sabios, expertos, que consagraron as súas vidas para estudar as súas áreas de coñecemento. Non teñades medo, non vivamos no vórtice dunha sociedade dominada por medos represivos, as perdas de prestixio e as situacións nas que o ser humano se pon á defensiva, como dicía Theodor Geiger".

García Díaz sinalou que "vivimos nunha sociedade hiperventilada, unha sociedade onde reina a hipnocracia, a través da que se exerce o poder, moi sutilmente, xa non desde os palacios ou edificios gobernamentais. Nesta sociedade segue existindo a realidade obxectiva, si, a verdade, o que sucede é que como sinala o filósofo, a nosa capacidade como sociedade para experimentala e poñernos de acordo sobre ela, foi desmantelada aos poucos".

Unha sociedade hipnocrática non necesita acabar coa verdade, senon orixinar suficientes verdades que quitan autoridade e poder a toda versión única da realidade. "Fixádevos que esa orde hipnocrática non precisa prescindir da verdade senon crear outras verdades, tantas como para facer que calquera versión única da verdade quede sen poder de autoridade", indicou o poñente.

A paisaxe hipnocrática está constituida "pola desinformación, as narrativas opostas, é dicir, os mundos paralelos nos que viven algúns. Sede vós defensores da verdade coa vosa acción de estudantes, de buscadores do Coñecemento, do pensamento crítico e do debate de ideas, que se opoñen á ramplonería, á falsidade, á arrogancia, á sevicia ou á soberbia, ademais da inmediatez precipitada dos xuízos que emponzoñan os xardíns da palabra", como recentemente dixo o noso reitor, Ricardo Mairal. Nesta tarefa magna teredes o apoio decidido da UNED".