Investigadores da UNED descobren en Zamora o esquelete máis completo dun cocodrilo terrestre do Eoceno en Europa
Un equipo multidisciplinar liderado polo Departamento de Xeología da Universidade de Salamanca (USAL) e polo Grupo de Bioloxía Evolutiva da UNED localizaron na provincia de Zamora un achádego excepcional: o esquelete postcraneal máis completo de Iberosuchus descoberto ata a data en Europa, un cocodrilo terrestre que habitou a península ibérica fai máis de 40 millóns de anos.
OURENSE, 30 de xuño de 2025."Este cocodrilo non era acuático, senón un depredador terrestre de longas patas. Tratábase dunha especie oportunista que ocupou o nicho deixado polos dinosaurios extintos, prosperando ata a chegada dos grandes mamíferos carnívoros", explica Francisco Ortega, paleontólogo da UNED e especialista en réptiles fósiles. O exemplar recuperado inclúe osos longos, elementos do pé e parte da súa armadura dérmica (osteodermos), unha información anatómica inédita ata o de agora.
Unha campaña que reactiva décadas de silencio
A descoberta destes investigadores da UNED forma parte da primeira campaña paleontolóxica na conca do Douro desde os anos noventa. A zona, de gran potencial fosilífero, levaba máis de tres décadas sen excavacións sistemáticas pola falta de recursos e investigadores.
Francisco Ortega, que participou en traballos iniciais nesta mesma rexión cando era estudante, salienta a emoción do regreso: "Volver aquí e atopar un exemplar tan completo é moi ilusionante. Esta descoberta abre novas liñas de investigación e colaboración entre institucións".
A UNED, referente no estudo de réptiles fósiles
O Grupo de Bioloxía Evolutiva da UNED desenvolveu un papel central tanto na excavación como na análise dos restos. A maiores do cocodrilo, no mesmo xacemento recuperánronse fósiles de tartarugas, claves para comparar a diversidade do Eoceno en Castilla e León.
O investigador Adán Pérez, tamén da UNED e especialista en tartarugas fósiles, subliña a importancia do achádego: "Estes restos permítennos reconstruir mellor as asociacións faunísticas do Eoceno na península".
O equipo investigador da UNED é especialista en réptiles e compleméntase coa Universidade de Salamanca e a do País Vasco, centradas no estudo de mamíferos primitivos e paleoambientes, xerando un equipo de investigación global, con proxección internacional.
O destino de los fósiles: a Sala das Tartarugas
Todos os materiais recuperados pasarán a formar parte da colección científica da Sala das Tartarugas da Universidade de Salamanca, considerada unha das coleccións máis importantes de Europa en fósiles do Eoceno. Esta sala é tamén un centro de referencia para a divulgación e o estudo de vertebrados fósiles na península ibérica.
Un corredor clave para a evolución
A conca do Douro actuou durante o Eoceno como un corredor bioxeográfico entre a fauna ibérica e europea. A súa posición estratéxica facilita o estudo das migracións, adaptacións evolutivas e extincións que marcaron esta época, nun clima subtropical que favoreceu unha rica biodiversidade.
Os investigadores da UNED salientan o potencial desta liña de traballo para xerar coñecemento de alto impacto sobre os ecosistemas do pasado e a evolución da fauna reptiliana.
UNED Ourense
Comunicación
